ДХХ ва божхона ходимлари ҳамкорлигида Россия рубли ва АҚШ долларидан иборат йирик миқдордаги валютани “ташмачилар” орқали Қозоғистонга олиб чиқиш режасига чек қўйилди.
Тошкент вилоятида ДХХнинг ҳудудий бошқармаси ва божхона органлари томонидан ўтказилган тезкор тадбир давомида хорижий валютани ноқонуний равишда Қозоғистонга олиб чиқишга уриниш фош этилди.
Тошкент туманида ўтказилган операция вақтида 1995 йилда туғилган шахс 5 млн 622 минг Россия рублини кичик партияларга бўлиб, Қозоғистонга ўтказиб бериш учун “ташмачи”га топшираётган пайтда ушланди.
Тадбир давом эттирилиб, гумонланувчининг автомобили ва яшаш хонадонидан қўшимча равишда 11 220 АҚШ доллари ҳамда валюта эгаларининг исмлари қайд этилган дафтар топилди ва процессуал тартибда расмийлаштирилди.
Мазкур ҳолат юзасидан Жиноят Кодексининг 25,182-моддаси 2-қисми “а” банди билан жиноят иши қўзғатилиб, шахсга нисбатан “қамоқ” эҳтиёт чораси қўлланди. Ҳозирда тергов ҳаракатлари давом этмоқда.
