Тошкент, Қашқадарё ва Бухоро вилоятларида ер ажратиш ва ҳужжатларни расмийлаштириш билан боғлиқ ноқонуний битимлар устидан ўтказилган тезкор тадбирларда бир нечта шахслар қўлга олинди.
Давлат хавфсизлик хизмати ва Иқтисодий жиноятларга қарши курашиш департаменти ҳамкорлигида ўтказилган тадбирларда бир нечта ноқонуний ҳолатлар аниқланган.
Оҳангарон туманидаги унитар корхона юристи ўз танишлари орқали Нураффшон шаҳрида паррандачилик учун ажратилган 90 сотих ер майдонини 250 минг долларга “сотиб беришини” айтган. Шунингдек, ерда коттежлар қуришга рухсат олиб беришни ваъда қилиб, бунинг эвазига қўшимча 30 минг доллар сўраган. У аванс сифатида 40 минг доллар олаётганда қўлга олинган.
Қашқадарёда эса газ таъминоти бўлими ходими давлат захирасидаги 1 гектар ерни 500 миллион сўмга сотишга келишиб, олдиндан 20 минг доллар олганида ушланган.
Бошқа ҳолатда, Бухорода маклерлик билан шуғулланувчи, илгари судланган шахс 1 250 квадрат метрли кўчмас мулк тоифасини ўзгартириб бериш эвазига 14 минг доллар талаб қилгани учун қўлга олинган.
Ҳозирда барча ҳолатлар юзасидан жиноят ишлари қўзғатилган. Тергов ҳаракатлари давом этмоқда, шунингдек, ишга алоқадор бошқа шахслар ҳам аниқланмоқда.
