Энергетика вазири Жўрабек Мирзамаҳмудов 11 декабрда Олий Мажлис Қонунчилик палатасида ҳисобот бериб, Фарғона водийсидаги автомобилларга газ қуйиш станцияларида (АГКС) юзага келиши мумкин бўлган тақчилликни бартараф этиш чоралари ҳақида маълумот берди.
Вазирнинг таъкидлашича, янги ташаббус икки йўналишда амалга оширилмоқда: биринчиси, қўшни давлатдаги транзит трубалар орқали газ таъминотини яқинроқ масофадан таъминлаш; иккинчиси, 150 та кўчма газ қуйиш шохобчалари орқали зарур куб метрда газ етказиб бериш.
“22 декабргача Бешариқдаги шохобча тўлиқ ишга тушади. Ҳозир технологик ускуналар ва контейнерлар олиб келиняпти. Бу тизим орқали газ заправка ўчган пайтда ҳам 5 мингдан 10 минг куб метргача газ етказиш имкони пайдо бўлади”, — деди Мирзамаҳмудов.
Ҳозирда 14 та АГКС билан тизим синаб кўрилган ва 22 декабрдан кейин Фарғона водийсида захира сифатида жорий қилинади. Бу чоралар қиш мавсумида метан тақчиллигининг олдини олишга қаратилган.
