TRT World хабарига кўра, ҳодиса 2025 йил 7 декабрь куни содир бўлган. Миср Ташқи ишлар вазирлиги маълумотига кўра, қайиқ қўшни давлатлардан биридан Греция томон йўл олган бўлиб, бортида турли миллатларга мансуб 34 нафар ноқонуний мигрант бўлган. Уларнинг камида 14 нафари Миср фуқаролари экани аниқланган.
Вазирлик Греция расмийлари билан ҳамкорликда қутқарилганларга ёрдам кўрсатиш ва ҳалок бўлган мисрликларнинг жасадларини ватанга қайтариш ишларини жадаллаштираётганини маълум қилган. Шунингдек, Миср фуқаролари ноқонуний миграция тармоқларига ишонмасликка ва ҳаётларини хавф остига қўймасликка чақирилган.
Қайд этилишича, Европа Иттифоқига кириш дарвозаларидан бири ҳисобланган Крит оролига етиб бориш учун мигрантлар кўпинча Ливия ва бошқа қўшни давлатлардан транзит ҳудуд сифатида фойдаланади. Июль ойида Греция ҳукумати Ливиядан Критга келган мигрантлар учун бошпана аризаларини вақтинча тўхтатган эди.
