Навоий вилояти Ички ишлар бошқармасида ИИВ вазири ўринбосари раҳбарлигида танқидий-таҳлилий йиғилиш бўлиб ўтди. Унда хизмат интизомини мустаҳкамлаш, коррупсион ҳолатларнинг олдини олиш ва салбий хатти-ҳаракатларга сабаб бўлаётган омилларни бартараф этиш масалалари муҳокама қилинди.
Маълум қилинишича, жорий йилнинг 10 ойи давомида ички ишлар органлари ходимлари томонидан 93 та салбий ҳолат содир этилган. Натижада 10 нафар ходим ички ишлар органлари сафидан четлаштирилган, яна 13 нафар ходимга нисбатан хизмат текширувлари тайинланган.
Йиғилишда раҳбарларга шахсий таркиб устидан кундалик назоратни кучайтириш, ходимларнинг хизмат фаолияти, ижтимоий ва руҳий ҳолатини инобатга олган ҳолда вазифалар юклаш зарурлиги қатъий таъкидланди. Шунингдек, ички ишлар органларини янада профессионал ва халқчил тизим сифатида ривожлантириш бўйича қўшимча чора-тадбирлар белгиланди.
