Давлат хавфсизлик хизмати ва Прокуратура органлари ходимлари томонидан ўтказилган тезкор тадбирлар натижасида Тошкент, Самарқанд ҳамда Гулистон шаҳарларида фаолият юритиб келган уч нафар адвокатнинг ноқонуний ҳаракатларига чек қўйилди.
Хусусан, Тошкент шаҳрида муқаддам судланган адвокат жиноят иши бўйича суд тизимидаги танишлари орқали айбловларни енгиллатиб бериш ва озодликдан маҳрум қилиш билан боғлиқ бўлмаган жазо тайинланишига ёрдам бериш эвазига 10 минг АҚШ доллари талаб қилган. У шундан 5 минг АҚШ долларини олган вақтда қўлга олинган.
Самарқанд шаҳрида эса маҳаллий адвокатлик фирмаси адвокати суд ишларида “ёрдам бериш” баҳонасида 4 минг АҚШ доллари олган пайтда ушланган.
Шунингдек, Сирдарё вилоятининг Гулистон шаҳрида фаолият юритувчи адвокат 450 млн сўмлик дори воситаларини олиб, пулини бермаган шахсларга нисбатан жиноят иши қўзғаттириб бериш эвазига 1500 АҚШ доллари олган вақтида фош этилган.
Айни вақтда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
