Миср Араб Республикасида хорижий фуқаролар, жумладан, Ўзбекистон фуқаролари устидан назорат кучайтирилгани сабабли ушлаб турилиш ҳолатлари кўпаймоқда. Бу ҳақда Ўзбекистоннинг Мисрдаги элчихонаси расмий огоҳлантириш билан чиқди.
Қайд этилишича, сўнгги пайтларда элчихонага маҳаллий ҳуқуқ-тартибот идоралари томонидан ушлаб турилган Ўзбекистон фуқаролари билан боғлиқ мурожаатлар сони ошган. Ушбу ҳолатлар юзасидан Миср ваколатли органлари билан музокаралар олиб борилмоқда.
Миср расмийларининг маълумотига кўра, Қоҳира ва бошқа йирик шаҳарларда миграция қонунчилиги ҳамда жамоат тартиб-қоидаларига риоя этилиши устидан текширувлар кучайтирилган. Хусусан, мамлакат ҳудудида ноқонуний бўлиб турган, амалдаги ҳужжатларга эга бўлмаган ёки жамоат тартибини бузган хорижий фуқароларга нисбатан маъмурий чоралар, жумладан, депортация тадбирлари қўлланилмоқда.
Шу муносабат билан Мисрда бўлиб турган Ўзбекистон фуқароларига маҳаллий қонунчилик талабларига риоя қилиш, шахсни тасдиқловчи ҳужжатларни доимо ўзи билан олиб юриш, амалдаги виза ёки яшаш рухсатномасига эга бўлиш ҳамда рухсатсиз меҳнат фаолияти билан шуғулланмаслик қатъиян тавсия этилди.
Маҳаллий идоралар томонидан ушлаб турилган тақдирда эса фуқароларга имкон қадар тезроқ Ўзбекистоннинг Қоҳирадаги элчихонасига мурожаат қилиш сўралди.
