Акмал Шукуровни қамоқдан чиқариб юборган судьяларга нисбатан хизмат текшируви тайинланди. Бу ҳақда Судьялар олий кенгаши маълум қилди.
Қайд этилишича, Тошкент шаҳар суди апелляция инстанциясида мазкур иш кўриб чиқилгани билан боғлиқ ҳолатларга ойдинлик киритиш мақсадида хизмат текшируви бошланган. Текширув Судьялар олий кенгаши томонидан олиб борилмоқда.
Аввалроқ, тунги клуб олдида эркакни уриб, уни комага тушириб қўйган Акмал Шукуров 2025 йил 9 декабрь куни апелляция инстанцияси судининг ажрими билан озодликка чиққани хабар қилинганди.
Эслатиб ўтамиз, кейинчалик Тошкент шаҳар прокуратураси ушбу қарорга тафтиш тартибида протест киритган. Тафтиш ҳайъати протестни қаноатлантириб, Шукуровга жазоларни қисман қўшиш йўли билан 6 йил озодликдан маҳрум қилиш жазоси тайинлаган. Қамоқда ўтказилган муддат ҳисобга олиниб, унга 5 йил 3 ой 12 кун жазо муддати қолдирилган.
