Давлат хавфсизлик хизмати ва Божхона қўмитаси ходимлари ҳамкорлигида Андижон вилоятининг Хўжаобод туманида ўтказилган тезкор тадбирда олтин қуймаларнинг мамлакатдан ноқонуний олиб чиқилишига чек қўйилди.
Маълум қилинишича, “Дўстлик” чегара божхона пости яқинида Фарғона вилоятида яшовчи, 1994 йилда туғилган Т.Т. тўхтатилиб, унга тегишли хўжалик қопи кўздан кечирилган. Текширув давомида темир қопламали автомобиль эҳтиёт қисмлари ичига яширилган жами 7 кг 784 грамм олтин бўлаклари аниқланган.
Баҳолаш хулосасига кўра, ушбу олтин қуймаларнинг умумий қиймати 12 миллиард 465 миллион сўмдан ошади. Аниқланишича, олтинлар Тошкент шаҳридан юборилган бўлиб, Қирғизистондаги шахсга яширин йўл билан етказилиши режалаштирилган.
Мазкур ҳолат юзасидан Т.Т.га нисбатан Жиноят кодексининг 25, 182-моддаси 2-қисми “а” банди билан жиноят иши қўзғатилиб, унга нисбатан қамоқ эҳтиёт чораси қўлланган. Ҳозирда олтиннинг ҳақиқий эгалари аниқланмоқда.
