Қорақалпоғистоннинг Беруний туманида тадбиркорнинг тўйхона биносини қўлга киритган шахслар аниқланди. Бу ҳақда Иқтисодий жиноятларга қарши курашиш департаменти хабар қилди.
Маълум қилинишича, тадбиркорлик субъектларининг ҳуқуқларини ҳимоя қилиш юзасидан ўтказилган терговга қадар текширувда фуқаро Э.Ж. ва бошқалар ўзаро тил бириктириб, “Т.Г.” хусусий корхонаси раҳбари Д.К.нинг ишончига киришган.
Шундан сўнг, ушбу шахс корхонани МЧЖ сифатида ўзининг номига 100 фоиз якка таъсисчи ва раҳбар сифатида қайта рўйхатдан ўтказишга эришган ва тадбиркор Д.К.нинг тўйхона биносини фирибгарлик йўли билан қўлга киритган.
Ҳолат юзасидан Жиноят кодексининг фирибгарликни назарда тутувчи моддасига асосан иш қўзғатилиб, тергов ҳаракатлари ўтказилмоқда.
