Норвегия ҳукумати Россия томонидан эҳтимолий ҳужум содир бўлган тақдирда тинч аҳолини эвакуация қилиш режасини тайёрламоқда. Бу ҳақда Норвегия Фуқаро муҳофазаси бошқармаси раҳбари Элизабет Орсэтер маълум қилди.
Унинг айтишича, режа Қуролли кучлар ва полиция билан ҳамкорликда ишлаб чиқилмоқда ва аввало Россияга яқин ҳудудлар ҳамда ҳарбий объектлар жойлашган манзиллар хавф даражаси бўйича баҳоланяпти. Айниқса, мамлакатнинг шимолидаги Финнмарк вилоятида эвакуация масаласи муҳокама қилинган.
Норвегия томони Россиянинг Украинадаги тажрибасидан келиб чиқиб, энергетика инфратузилмаси ва тинч объектлар эҳтимолий зарба остида қолиши мумкинлигини инобатга олмоқда. Шунингдек, қайси муниципалитетлар эвакуация қилинган аҳолини қабул қилиши мумкинлиги ҳам аниқланмоқда.
Маълум қилинишича, эвакуация режаларини ишлаб чиқиш ва янгилаш 2026 йилда Норвегия ҳукуматининг устувор вазифаларидан бири бўлади.
