Анқара яқинида хусусий самолёт қулаб тушиши оқибатида Ливия армияси Бош штаби бошлиғи Муҳаммад Али Аҳмад ал-Ҳаддод ҳалок бўлди.
Туркия ОАВлари хабарига кўра, 23 декабрь куни Анқарадаги Эсенбоға аэропортидан Триполига учган Falcon 50 русумли самолёт билан парвоздан тахминан 40 дақиқа ўтиб алоқа узилган. Самолёт бўлаклари Анқара вилоятининг Хайман тумани ҳудудидан топилган.
Ливия ҳукумати генералнинг ҳалок бўлганини тасдиқлади. Туркия ички ишлар вазири Али Ерликая авиаҳалокат юзасидан тергов ишлари олиб борилаётганини маълум қилган. Самолёт бортида генерал билан бирга яна тўрт нафар йўловчи бўлган.
Муҳаммад ал-Ҳаддод Ливия ғарбидаги қўшинлар бош қўмондони бўлиб, мамлакат армиясини бирлаштириш жараёнида муҳим роль ўйнаган. Ҳодиса тафсилотлари аниқланмоқда.
