Нью-Йорк шаҳар полицияси (NYPD) ижтимоий тармоқларда “Гринч” — Рождество совғаларини ўғирлайдиган машҳур қаҳрамонни қидирувга бергани ҳақида ҳазиломуз эълон жойлади. Унда “жиноятчи”ни аниқлашга ёрдам берадиган маълумот учун 10 минг доллар мукофот таклиф этилган.
Полиция маълум қилишича, ушбу эълон реал жиноят билан боғлиқ эмас, балки байрам олдидан аҳоли кайфиятини кўтариш ва жамоатчилик билан яқин алоқани мустаҳкамлаш мақсадида тайёрланган. Ҳазил тариқасидаги “хабар”да Гринч 24 декабрга ўтар кечаси болаларнинг арча остидаги совғаларини ўғирлаб кетгани, бу ҳолат гўёки кузатув камераларида қайд этилгани айтилади.
NYPD байрамлар арафасида бундай ижодий постлар билан чиқиши билан аввал ҳам эътибор қозонган. Гринч образи эса болалар ёзувчиси Доктор Сюз томонидан яратилган бўлиб, кейинчалик мультфильм ва машҳур бадиий фильмлар орқали оммалашган.
