Украина президенти Владимир Зеленский Янги йил табригида Россия билан тинчликка умид билдирди. Давлат раҳбарининг мурожаати унинг Telegram каналида эълон қилинди.
"Биз тинчликка ишонамиз, у учун курашамиз ва у учун меҳнат қиламиз. Янги йилингиз билан, азиз украиналиклар!" — дейилади Зеленскийнинг рафиқаси Елена билан тушган байрамона фотосурати остидаги изоҳда.
Президентнинг таъкидлашича, якунланаётган 2025 йил Украина фуқароларининг матонати, фидойилиги ва кундалик меҳнатининг ёрқин намунаси бўлди. У янги йилда ҳам бирлик, инсон қадр-қиммати ва миллий қадриятларни асраб-авайлаш муҳимлигини қайд этди.
Шу билан бирга, Россия президенти Владимир Путин ҳам Янги йил табригида Украинага қарши урушда ғалаба қозонишга ишонч билдириб, ҳарбийларни байрам билан қутлади.
