АҚШнинг президенти Дональд Трамп ва Украина президенти Владимир Зеленский 19–23 январь кунлари Давосда бўлиб ўтадиган Жаҳон иқтисодий форуми доирасида 800 млрд долларлик битимни имзолаши мумкин. Келишув 10 йил давомида Украинани тиклаш ва иқтисодиётни оёққа қўйиш учун сармоя жалб этишни назарда тутади. Бу ҳақда The Telegraph нашри хабар берди.
Нашр манбаларига кўра, дастлаб Зеленский келишувни якунлаш учун Оқ уйга боришни режалаштирган, аммо Киевнинг Европадаги иттифоқчилари учрашувни Давосда ўтказиш таклифини илгари сурган.
Маълум қилинишича, битимнинг асосий қисми фойдали қазилмалар, хусусан нодир ер элементлари бўйича ҳамкорликни ўз ичига олади. Унга кўра, америкалик инвесторлар Украинадаги кончилик лойиҳаларида имтиёзли ҳуқуқларга эга бўлади. Трампнинг махсус вакили Стив Уиткофф мазкур келишувни ижобий баҳолаган.
Шу билан бирга, Украина АҚШ билан “нол божлар” сиёсатига асосланган эркин савдо келишуви тузиш имкониятини ҳам муҳокама қилмоқда. Бу ҳақда президент Зеленский Bloomberg агентлигига берган интервьюсида маълум қилган. Унинг сўзларига кўра, бундай келишув Украинага минтақада иқтисодий жиҳатдан устунлик бериши мумкин.
