АҚШ Президенти Дональд Трамп Ўзбекистон Республикаси Президенти Шавкат Мирзиёев номига йўллаган мактубида Яқин Шарқдаги можароларни ҳал этишга қаратилган халқаро ташаббусга қўшилиш бўйича расмий таклиф билдирган. Мазкур ташаббус 2025 йил 29-сентабрда эълон қилинган бўлиб, у Ғазодаги можарони тугатиш бўйича комплекс режа асосида ишлаб чиқилган ва БМТ Хавфсизлик Кенгашининг 2803-сонли резолюцияси билан маъқулланган.
Ташаббус доирасида узоқ муддатли тинчлик ва барқарорликни таъминлашга масъул бўлган давлатларни бирлаштирувчи янги халқаро тузилма — Тинчлик кенгашини ташкил этиш кўзда тутилган. Ўзбекистонга ушбу кенгашга таъсисчи давлат сифатида қўшилиш таклиф этилган.
Президент Шавкат Мирзиёев жавоб мактубида Ўзбекистон мазкур ташаббусни Яқин Шарқдаги кўп йиллик низоларни ҳал этиш йўлидаги муҳим қадам, деб баҳолаб, Тинчлик кенгашига таъсисчи давлат сифатида қўшилишга тайёр эканини билдирган.
