Мавжуд бўлмаган автомобилларни арзон нархларда сотишни ваъда қилиб, юзлаб фуқароларни алдаган шахсга нисбатан суд ҳукми чиқарилди. Бу ҳақда ИИВ матбуот хизмати хабар берди.
Маълум қилинишича, Қашқадарё вилояти Ғузор туманида туғилган, 1999 йилда туғилган М.А. Telegram мессенжерида “Ёлғиз бўри” номи билан аккаунт очиб, автомобиллар савдосига оид каналларда ўзига тегишли бўлмаган қимматбаҳо машиналар сотилаётгани ҳақида эълонлар жойлаштирган. Хусусан, BYD ва Toyota Prado русумли автомобиллар арзонлаштирилган нархларда таклиф қилинган.
Ишонч уйғотиш мақсадида у автомобилларнинг ишлаб чиқарилган йили, босиб ўтган масофаси ва техник ҳолати ҳақида батафсил маълумотлар бериб, интернет ва учинчи томон манбаларидан олинган фотосуратлар асосида видеолар тарқатган.
Фирибгар салонларда 80–90 минг доллар турадиган автомобилларни 50 минг долларга таклиф қилиб, харидорлардан 2 минг доллардан 5 минг долларгача бошланғич тўлов ўтказишни талаб қилган. Пуллар учинчи шахслар номига очилган виртуал ҳисобларга ўтказилгандан сўнг эса у мулоқотни тўхтатиб, ёзишмаларни ўчириб ташлаган.
Натижада у фуқароларга жами 4 млрд 800 млн сўмдан ортиқ моддий зарар етказган. Суд ҳукми билан М.А. Жиноят кодексининг 168-моддаси (фирибгарлик) бўйича айбдор деб топилиб, 5 йил 1 ой муддатга озодликдан маҳрум қилиш жазоси тайинланди.
