Муассасага ташриф давомида Туркияда содир этган жиноятлари учун қамоқда сақланаётган Ўзбекистон фуқаролари билан суҳбатлашилди. Уларнинг аҳволи ҳақида маълумот олинди, жазони ўташ шароитлари ўрганилди, зарур консуллик ва ҳуқуқий ёрдам кўрсатилди.
Аввалги ташрифда ҳамюртларимиз ўзбек тилидаги адабиётлар сўраган эди. Шу боис, Бош консулхона ташаббуси ва Ўзбекистон Оила ва хотин-қизлар қўмитаси, “Асахи” ва “Ҳилол нашр” босмахоналари кўмагида муассаса кутубхонасига Ўзбекистондан олиб келинган 100 дан ортиқ маърифий, илмий, диний ва оммабоп адабиётлар тўплами тақдим этилди.
Ташриф давомида тергов ҳибсхонасида сақланаётган Ўзбекистон фуқароларининг яшаш шароитлари, озиқ-овқат таъминоти, тиббий хизматдан фойдаланиш ва яқин қариндошлари билан телефон орқали мулоқот қилиш тартиби ўрганилди.
Фуқаролар билан якка тартибда ўтказилган суҳбатларда уларни қийнаётган муаммолар аниқланиб, ҳуқуқ ва эркинликлари, Туркия қонунчилигида белгиланган мажбуриятлар юзасидан тушунтиришлар берилди.
Ташриф якунлари бўйича Бош консулхона томонидан аниқланган муаммо ва камчиликларни ҳал этиш бўйича тегишли чоралар кўрилади.
