“Қонундаги ўғри — Бахти Ташкентский” номи билан танилган Бахтиёр Қудратуллаевнинг ўғли Бекзод Зафаров ИИВ томонидан эълон қилинган “Сўнгги пушаймон” кўрсатувига берган интервью берди.
Эсингизда бўлса, 2024 йилнинг 19 июль санасида суд ҳукми билан 40 дан ортиқ эпизод бўйича ЖКнинг 7 та моддаси доирасида айбланиб, Бахтиёр Қудратуллаев 20 йил муддатга, унинг ўғиллари — Ихтиёр Қудратуллаев 9 йилга, Бекзод Зафаров эса 11 йилга озодликдан маҳрум қилинганди.
Икки йилдан буён панжара ортида ўтирган маҳкумнинг ОАВга берган интервьюсини Ички ишлар вазирлиги оммага тақдим қилди. Интервьюда Бекзод Зафаров отасининг касбини эгаллаш ҳақида хом хаёлларга боргани ҳақида берди.
“Отамнинг йўналишларини ушлайман, отамнинг шу касбини эгаллайман деган хаёлларда юрган эдим. Энди бу ўйлаганларимнинг ҳаммаси катта хато экан”, - дейди у.
Маҳкум интервью давомида колонияга келганига бир йил бўлганини ва у ерда хўжалик ишларига, қурилишларга қарашиб турганини айтиб ўтган. Қолган пайт эса ишлаб чиқариш корхонасига ишга чиқишини, бу ерда пайвандчилик, темир-терсак билан ишлашинр ҳам қўшимча қилган.
"Бир йил олдинги ҳаётим билан ҳозирги ҳаётим анча фарқли. Бу ерда Бекзодмисан, Бекмисан, ким бўлсанг ҳам, ҳамма учун қонун бир. Жиноят оламининг таниқли шахсларига, жиноят оламига ўзи ҳеч ким эргашмасин. Бу нарсадан ҳеч қанақа фойда йўқ. Эл-юртнинг, ота-онанинг хизматида бўлсин, маҳаллага, ҳамма шу жамиятга фойдаси тегадиган инсон бўлсин. Шу нарсани мен тушуниб етдим”, деди Бекзод Зафаров.
Маҳкум оиласи, фарзандларини соғинаётганини айтди:
“Қамалиб, одам бошига тушганда нималар йўқотганини тушунар экан. Фарзандларим икки нафар. Катта ўғлим кейинги йил мактабга чиқади. “Тезроқ келинг, сизни соғиндим”, деди. Шу гаплари ҳали ҳамон хаёлимдан кетмайди. Тунда кўзларимни юмиб ётганимда болаларим, оилам тушимга кириб чиқади. Ўзимнинг шу мактабга чиқаётган пайтларимни эслаб, ҳозирги кунда ўғлимни биринчи синфга, биринчи қўнғироққа олиб чиқолмаётганим, ота-оналар мажлисида иштирок эта олмаслигимдан пушаймонман. Фарзандларимга яхши ўрнак бўлиб, олдида суянган тоғи бўла олмаётганим алам қилади, одамга. Шу нарсалардан афсусдаман. Қизимнинг мана тили чиқиб, ҳар хил ширин қилиқлари пайдо бўлаётган пайтда шу нарсаларни кўра олмаяпман. Шу нарсаларни ўтказиб юборяпман. Оила — бу муқаддас”.
“Шуни тушуниб етдимки, ҳибсхонада ош еб, идиш-товоқларингиз тилладан бўлгандан кўра, кўчада оила даврасида бир бурда нон еб юрганингиз минг марта афзалроқ экан", - дейди маҳкум суҳбат давомида.
