Эроннинг Исроил ҳудудига уюштирган навбатдаги ракета ҳужумларидан сўнг ҳалок бўлгани ҳақида хабарлар тарқалган Исроил бош вазири Бинямин Нетаняху омма олдида кўриниш берди. Бу ҳақда The Jerusalem Post маълум қилди.
Қайд этилишича, Нетаньяху собиқ бош вазир Нафтали Беннет ва мухолифат етакчиси Яир Лапид билан бирга Байт-Шемеш шаҳрида Исроил–АҚШ қўшма операцияси юзасидан хавфсизлик бўйича ёпиқ учрашув ўтказган. Учрашувда Эронга қарши ҳарбий амалиётларни давом эттириш масаласи муҳокама қилинган.
Бош вазир журналистларга берган интервьюсида операция қатъий давом этишини таъкидлаб, бу кураш нафақат Исроил, балки бутун инсоният хавфсизлиги учун муҳим эканини айтган. “Эрон халқи зулм бўйинтуруғини ечиб юборадиган кун яқинлашмоқда. Бу инсоният учун кураш”, деган у.
Нафтали Беннет эса ҳар бир зарба Эроннинг йиллар давомида шаклланган ҳарбий инфратузилмасини заифлаштиришга қаратилганини билдириб, Исроил фуқароларини қатъиятли бўлишга ва хавфсизлик қоидаларига амал қилишга чақирган.
