Наврўз ва Рамазон ҳайити олдидан имзоланган ҳужжатга кўра, юзлаб маҳкумларга енгиллик берилди.
Ўзбекистон президенти Шавкат Мирзиёев томонидан имзоланган фармонга асосан, жазо муддатини ўтаётган ва қилмишига пушаймон бўлган 392 нафар шахс афв этилди.
Уларнинг 223 нафари тўлиқ озод қилинган бўлса, 82 нафари жазони муддатидан олдин шартли равишда ўташдан озод этилган. Шунингдек, 34 нафар маҳкумнинг жазоси енгилроқ турга алмаштирилган, яна 53 нафарининг жазо муддати қисқартирилган.
Афв этилганлар орасида 3 нафар чет эл фуқароси, 26 нафар аёл, 14 нафар 60 ёшдан ошган шахслар ҳамда 166 нафар ёшлар борлиги маълум қилинди.
Масъул идораларга уларни жамиятга қайтариш, иш билан таъминлаш ва ижтимоий мослашувига кўмаклашиш бўйича топшириқлар берилган.
