Шу доирада Алишер Навоий номидаги Ўзбекистон Миллий кутубхонасида сунъий интеллект технологиялари асосида янги тизимларни жорий этиш режалаштирилмоқда.
Ҳукумат қарори лойиҳасига кўра, Миллий кутубхона фаолиятини рақамли трансформация қилиш ва интерактив хизматлар кўламини кенгайтиришга қаратилган қатор вазифалар белгиланган. Асосий эътибор китобхонларга хизмат кўрсатиш сифатини ошириш ҳамда ахборот ресурсларидан фойдаланиш имкониятларини кенгайтиришга қаратилган.
Ҳужжатда қайд этилишича, сунъий интеллект ёрдамида китобхонлар эҳтиёжларини таҳлил қилиш, уларга мос тавсиялар бериш ва ахборот қидириш жараёнларини тезлаштирувчи дастурий ечимлар ишлаб чиқилади. Бу эса фойдаланувчилар учун зарур маълумотларни топиш ва манбалардан фойдаланиш жараёнини анча енгиллаштириши кутилмоқда.
Шунингдек, 2027 йил 1 августга қадар ахборот ресурсларини кенг кўламда рақамлаштириш ишларини амалга ошириш режалаштирилган. Лойиҳа доирасида автоматик таниб олиш тизимларини жорий этиш, нашрларни электрон каталоглаштириш ва таснифлаш жараёнларини такомиллаштириш ҳам назарда тутилган.
Қарор лойиҳасида интерактив хизматлар сонини кўпайтириш, халқаро ахборот ресурсларидан фойдаланиш имкониятларини кенгайтириш чоралари ҳам белгиланган. Бу эса Миллий кутубхонани халқаро ахборот маконига интеграция қилишга хизмат қилиши айтилмоқда.
Бундан ташқари, “Маърифат маркази” биносининг бир қисмини китобхонларга хизмат кўрсатиш учун Миллий кутубхонага ажратиш таклиф этилган. Шу билан бирга, “Очиқ осмон остидаги кутубхона” форматида “Китобхонлар хиёбони”ни ташкил этиш имконияти ҳам кўриб чиқилмоқда.
