Кеча, 28 май куни Франция Миллий ассамблеяси XVII–XVIII асрларга оид “Қора кодекс”ни расман бекор қилди. Қарор депутатлар томонидан бир овоздан қабул қилинди ва мамлакатнинг мустамлакачилик давридан қолган ҳуқуқий меросини бартараф этиш йўлидаги муҳим қадам сифатида баҳоланди.
“Қора кодекс” Людовик XIV даврида ишлаб чиқилган бўлиб, Франция колонияларида қуллик тизимини тартибга солувчи ҳужжатлар мажмуаси ҳисобланган. Унда қуллар “инсон эмас, балки мулк” сифатида баҳоланган ва уларни сотиш, сотиб олиш ҳамда мерос қилиб қолдириш мумкин бўлган.
Гарчанд Францияда қуллик 1848 йилда расман бекор қилинган бўлса-да, мазкур кодекс матни ҳуқуқий архивларда сақланиб қолган ва расмий жиҳатдан амалда ҳисобланиб келган.
Янги қонун лойиҳаси Гваделупа депутати Макс Матиазан томонидан илгари сурилди. Ташаббус парламентдаги деярли барча сиёсий кучлар томонидан қўллаб-қувватланган. Фақат “Миллий бирлашув” партияси овоз бериш жараёнида иштирок этмаган.
Муҳокамалар давомида депутатлар ушбу қарорни республика қадриятларига зид бўлган тарихий изларни йўқотиш ва тенглик тамойилларини мустаҳкамлаш йўлидаги муҳим қадам сифатида баҳолаган.
Шунингдек, Франциянинг денгиз орти ҳудудлари вакиллари метрополия ҳамда чекка ҳудудлар ўртасидаги ижтимоий-иқтисодий тафовутлар ҳануз сақланиб қолаётганини таъкидлади. Улар тўғридан тўғри компенсация эмас, балки таълим, инфратузилма ва ижтимоий дастурларга сармояларни кўпайтиришни сўраган.
Франция президенти Эммануэль Макрон эса бу масалани “эътиборсиз қолдириб бўлмайди” деб атаган. Бироқ у тўлиқ компенсация ғоясига эҳтиёткорона ёндашган.
“Бу тарихий жиноятни тўлиқ қоплаб бўлмайди”, — деган Макрон.
“Қора кодекс”нинг бекор қилиниши асосан рамзий ва тарихий аҳамиятга эга қарор сифатида баҳоланмоқда. У Франциянинг мустамлакачилик ўтмиши билан боғлиқ ҳуқуқий қолдиқларни тугатиш ва республикада тенглик тамойилларини яна бир бор тасдиқлашга қаратилган.
