Ўзбекистонда 2027–2030 йиллар давомида бешта янги сел-сув омбори барпо этилади. Бу Президентнинг “Сел-тошқин сувларидан самарали фойдаланишни таъминлаш чора-тадбирлари тўғрисида”ги қарорида белгиланди.
Ҳужжатга кўра, сел-сув омборлари Жиззах, Самарқанд ва Тошкент вилоятларида қурилади. Жумладан, Жиззах вилояти Бахмал туманида Тангатопдисой, Самарқанд вилояти Ургут туманида Ғиждувонсой ва Чоштепасой, Қўшработ туманида Оқтепасой, шунингдек, Тошкент вилояти Бўстонлиқ туманида Оқсоқотасой сел-сув омборлари барпо этилиши режалаштирилган.
Қайд этилишича, ушбу лойиҳа натижасида Самарқанд вилоятида 7 минг гектар, Тошкент вилоятида 2 минг гектар, Жиззах вилоятида эса 300 гектар ернинг сув таъминоти яхшиланади. Шунингдек, Самарқандда 3,3 минг гектар, Тошкент вилоятида 300 гектар янги ер ўзлаштирилади.
Маълумотларга кўра, республика бўйича кичик сув захираларини яратиш имкони мавжуд бўлган 60 та ҳудуд аниқланган. Лойиҳа доирасида сел ва тошқин сувларини самарали йиғиш орқали қишлоқ хўжалиги ишлаб чиқаришини ошириш ҳамда янги иш ўринлари яратиш кўзда тутилмоқда.
Шунингдек, айрим омборлар давлат-хусусий шериклик асосида барпо этилади. Хусусан, Жиззахдаги Тангатопдисой ва Тошкент вилоятидаги Оқсоқотасой лойиҳаларига хусусий инвесторлар жалб этилади.
Қарорга мувофиқ, сел-сув омборлари атрофида туристик-рекреация зоналари ва балиқчилик хўжаликлари ташкил этишга ҳам рухсат берилади. Инфратузилма объектлари эса давлат бюджети ҳисобидан молиялаштирилади.
