АҚШ президенти Доналд Трамп Эронни Ҳормуз боғозини очишга чақириб, Теҳронга 48 соатлик ултиматум қўйганини маълум қилди, дея ёзмоқда "zamon.uz".
Президент таъкидлаганидек, агар боғоз ушбу муддат ичида тўлиқ очилмаса, АҚШ Эроннинг энергетика инфратузилмасига, жумладан электр станцияларига зарбалар беришни бошлаши мумкин. Унинг сўзларига кўра, биринчи навбатда мамлакатдаги энг йирик энергетика иншоотларидан бири нишонга олинади. Доналд Трамп бу баёнотни ўзининг Truth Social ижтимоий тармоғида эълон қилган.
Шунингдек, Исраэль Кац аввалроқ IDF ҳамда АҚШ ҳарбийлари яқин вақт ичида Эронга қарши зарбаларни кучайтириш эҳтимоли борлигини маълум қилган эди.
Бундан олдин 22 та давлат расмийлари Ҳормуз боғози орқали кемаларнинг хавфсиз ҳаракатланишини таъминлаш бўйича халқаро саъй-ҳаракатларни қўллаб-қувватлашга тайёр эканликларини билдирган. Улар Эроннинг қўшни давлатларга қаратилган ҳужумларини қоралаб, зарардан жабр кўрган мамлакатларга молиявий ёрдам кўрсатишга ҳам тайёр эканликларини маълум қилган.
Шу билан бирга, NBC News хабарига кўра, Оқ уй маъмурияти Ҳормуз ҳудудида кемалар хавфсизлигини таъминлаш мақсадида Эрон портларини назорат қилиш ҳамда Форс кўрфазидаги айрим кичик оролларга қўшин жойлаштириш эҳтимоли ҳам муҳокама қилмоқда.
