Россия Федерал хавфсизлик хизмати жамоатчилик билан алоқалар маркази маълумотига кўра, қарор 2023 йил 28 апрелда қабул қилинган “Россия Федерацияси фуқаролиги тўғрисида”ги федерал қонун асосида чиқарилган.
Фуқаролиги бекор қилинганлар орасида Твер вилоятида яшаган шахс ҳам бор. У Crocus City Hall концерт залида содир этилган терактга алоқадорликда гумон қилинаётган шахсга Россия ҳудудида ноқонуний яшашга ёрдам берганликда айбланмоқда.
Шунингдек, Тула вилоятида яшаган шахс ноқонуний қурол сақлашда айбдор деб топилган. Бурятияда истиқомат қилган шахс эса миллатчилик ғояларини тарқатганликда айбланган.
Олтой ўлкасидан бўлган яна бир неча шахс енгил тан жароҳати етказиш ва калтаклаш билан боғлиқ жиноятлар учун бир неча бор жавобгарликка тортилгани айтилмоқда.
Тюмень вилоятида яшаган уч нафар шахс “антироссия кайфиятини” тарғиб қилиш ва этник гуруҳлар ўртасида можаро қўзғатишга чақириқ қилгани учун фуқароликдан маҳрум этилган.
Архангельск вилоятида истиқомат қилган яна бир шахс эса миллатлараро ва этник-диний кескинликни кучайтиришга шароит яратганликда айбланган.
