Ўзбекистон Республикаси Президенти Шавкат Мирзиёев 4–5 июнь кунлари амалий ташриф билан Россия Федерациясида бўлади. Бу ҳақда Президент матбуот хизмати хабар қилди.
Маълум қилинишича, давлат раҳбари Россия Президенти Владимир Путиннинг таклифига биноан Санкт-Петербург шаҳрига ташриф буюради.
Ташриф доирасида Шавкат Мирзиёев "Прагматик мулоқот – барқарор келажак сари йўл" шиори остида ўтадиган XXIX Петербург халқаро иқтисодий форумининг ялпи мажлисида иштирок этади ҳамда нутқ сўзлайди.
Президент ўз чиқишида жаҳон иқтисодиётидаги бугунги вазият, Ўзбекистон ва Россия ўртасидаги иқтисодий ҳамкорлик истиқболлари, шунингдек, мамлакатни ижтимоий-иқтисодий ривожлантиришнинг устувор йўналишлари хусусида фикр билдириши кутилмоқда.
Ташриф дастуридан Россия Президенти Владимир Путин билан учрашув ҳам ўрин олган. Музокаралар давомида икки давлат ўртасидаги стратегик шериклик ва кўп қиррали ҳамкорликни янада кенгайтириш масалалари муҳокама қилиниши режалаштирилган.
Шунингдек, Ўзбекистон раҳбари мамлакатда барпо этилаётган биринчи интеграциялашган атом электр станцияси қурилиши бошланишига бағишланган маросимда ҳам иштирок этади.
