Кеча, 2 июнь куни Ўзбекистон Президенти Администрацияси раҳбари Саида Мирзиёева Европада хавфсизлик ва ҳамкорлик ташкилоти (ЕХҲТ) Бош котиби Феридун Синирлиўғли билан учрашди. Бу ҳақда Мирзиёева ўзининг Telegram-каналида маълум қилди.
Қайд этилишича, суҳбат аввалида Феридун Синирлиўғли Ўзбекистонга яқинда амалга оширган ташрифи ҳамда Президент Шавкат Мирзиёев билан бўлиб ўтган учрашувини илиқ таассуротлар билан ёдга олган. Шунингдек, у ЕХҲТ Ўзбекистон томонидан илгари сурилаётган ташаббусларни қўллаб-қувватлашга тайёр эканини билдирган.
Учрашув давомида трансмиллий таҳдидларга қарши курашиш, рақамли технологиялар ва сунъий интеллект соҳасидаги ҳамкорлик, ёшлар манфаатларини ҳимоя қилиш, гендер тенглигини таъминлаш ҳамда суд-ҳуқуқ тизимидаги ислоҳотлар масалалари муҳокама қилинган.
Томонлар мазкур йўналишлардаги ҳамкорлик истиқболлари юзасидан фикр алмашиб, ўзаро мулоқотни янада кенгайтириш муҳимлигини қайд этган.
