Бугун, 4 июнь куни Тошкент шаҳри электр тармоқларида юзага келган юқори кучланишдаги узилиш сабаб пойтахт метросининг бир нечта йўналишида қисқа муддатли носозлик кузатилди.
Тошкент метрополитени маълум қилишича, соат 12:41 атрофида шаҳар электр таъминотидаги узилиш оқибатида метронинг «Ўзбекистон», «Чилонзор» ва «Юнусобод» йўналишларида электр энергияси таъминоти вақтинча тўхтаб қолган.
Қайд этилишича, ҳодиса поездлар ҳаракатига ҳамда бекатлардаги ёритиш тизимлари фаолиятига таъсир кўрсатган.
Метрополитен маълумотига кўра, вазият зудлик билан назоратга олинган. Электр таъминоти тўлиқ тиклангунга қадар захира генераторлари ишга туширилган.
Айни вақтда поездлар ҳаракати масъул мутахассислар назорати остида амалга оширилмоқда. Ҳодиса оқибатларини бартараф этиш ва электр таъминотини тўлиқ тиклаш ишлари давом этмоқда.
