Тошкент шаҳри жамоат транспорти тизимида йўловчилар учун янги тартиб жорий этилади. Бу ҳақда Ҳукуматнинг шаҳар йўловчи транспорти тизимини янада такомиллаштиришга қаратилган қарорида белгиланган.
Қарорга кўра, 2026 йил 1 сентябрдан бошлаб валидаторлар билан жиҳозланган автобусларга чиққан ҳар бир йўловчи сафарини электрон тарзда тасдиқлаши шарт бўлади. Бу транспорт картаси, банк картаси, смартфон ёки бошқа контаксиз тўлов воситалари орқали амалга оширилади.
Шунингдек, ижтимоий ёки транспорт картаси орқали имтиёзли ва бепул қатнов ҳуқуқига эга фуқаролар ҳам валидатор орқали ўз мақомини тасдиқлаши лозим.
Ҳукумат қарорида шаҳар жамоат транспортини модернизация қилиш чоралари ҳам назарда тутилган. Хусусан, ҳайдовчи билан бирга камида 60 нафар йўловчи ташиш имкониятига эга ҳамда «Евро-5» ва ундан юқори экологик стандартларга жавоб берадиган автобус, электробус ва троллейбусларни импорт қилиш учун қатор имтиёзлар жорий этилмоқда.
Белгиланишича, 2027 йил 31 декабрга қадар мазкур турдаги транспорт воситалари мамлакатга олиб кирилганда улар учун утилизация йиғимига нол ставка қўлланилади. Бу эса шаҳар автобус паркларини янгилаш жараёнини жадаллаштириши кутилмоқда.
Қарор билан шаҳар автобус йўналишлари тушунчасига ҳам ўзгартиш киритилди. Энди шаҳар чеккасидан транспорт ва йўл-транспорт инфратузилмасини ривожлантириш бош режаларига мувофиқ 12 километргача чиқувчи йўналишлар ҳам шаҳар автобус йўналишлари сифатида эътироф этилади.
Бундан ташқари, Транспорт вазирлигига 2026 йил 1 сентябрга қадар жамоат транспорти ва шаҳар атрофи электр поездлари учун интеграциялашган тўлов тизимини жорий этиш вазифаси юклатилди. Мазкур тизим доирасида "электропоезд – автобус" ва "электропоезд – метро" каби ягона тариф режаларини ишлаб чиқиш режалаштирилган.
