Россия президенти Владимир Путин Украина президенти Володимир Зеленскийнинг урушни тўхтатиш бўйича таклиф этилган шахсий учрашувини рад этди. Бу ҳақда у Санкт-Петербург халқаро иқтисодий форумида сўз юритди.
Путиннинг айтишича, Зеленский юборган мактубда “такббурлик элементлари” бор ва унинг мазмуни қониқарсиз бўлган. У, шунингдек, учрашувдан мақсад фақат аниқ келишувлар бўлиши кераклигини, “қуруқ гаплар билан вақт йўқотиш”га ҳожат йўқлигини таъкидлади.
Россия етакчиси Украина томонини Конституциядан ташқари ҳокимиятни ушлаб туришда айблаб, сайловлар масаласига ҳам эътибор қаратди. Унинг сўзларига кўра, бу масала жиддий сиёсий аҳамиятга эга.
Зеленский эса Telegram орқали билдирган муносабатида Россия яна уруш йўлини танлаётганини, бу эса халқаро ҳамжамиятда умидсизлик уйғотаётганини таъкидлади. Унинг қайд этишича, Россияга босим кучайтирилиши керак.
Томонлар баёнотлари фонида урушни якунлаш бўйича музокаралар истиқболи яна савол остида қолмоқда.
