Давлат хавфсизлик хизмати ва Ички ишлар органлари ҳамкорлигида ўтказилган тезкор тадбирлар давомида терроризмни молиялаштириш билан боғлиқ жиноий фаолиятга чек қўйилди. Бу ҳақда ДХХ маълум қилди.
Қайд этилишича, Тошкент шаҳри, Самарқанд, Бухоро, Андижон ва Фарғона вилоятларида яшовчи, 1987–1998 йилларда туғилган 8 нафар фуқаро Суриядаги «Ғуроба катибаси» террорчилик ташкилоти билан боғлиқ шахсга пул маблағлари ўтказиб келган.
Тергов материалларига кўра, Қирғизистон фуқароси Абдулмуҳсин Усмонов ижтимоий тармоқлар орқали «Саъд Мухтор» тахаллуси билан фаолият юритиб, Фаластинда жабр кўрган мусулмонларга ёрдам кўрсатиш баҳонасида хайрия маблағлари йиғган. Аммо тўпланган маблағлар аслида Суриядаги террорчилик тузилмалари эҳтиёжлари учун сарфлангани аниқланган.
Суд ҳукмига мувофиқ, жиноят ишида айбдор деб топилган шахсларнинг 7 нафари 3 йилдан 8 йилгача муддатга озодликдан маҳрум қилинган. Яна бир шахсга нисбатан 4 йил 4 ой муддатга озодликни чеклаш жазоси тайинланган.
Эслатиб ўтамиз, Ўзбекистон Республикаси Жиноят кодексининг 155-3-моддасига мувофиқ, терроризмни молиялаштириш жинояти учун 15 йилгача озодликдан маҳрум қилиш жазоси назарда тутилган.
Давлат хавфсизлик хизмати фуқароларни ижтимоий тармоқлардаги шубҳали хайрия чақириқларига ишонмасликка чақириб, маблағ ўтказишдан олдин хайрия акцияларининг қонунийлиги ва манбасини текшириш зарурлигини таъкидлади.
