Тошкент вилоятининг Оҳангарон тумани ҳудудидан ўтувчи халқаро аҳамиятга эга А-373 автомобиль йўлининг бир қисмида транспорт воситалари учун ҳаракат тезлиги чекланди. Бу ҳақда Халқ депутатлари Тошкент вилояти Кенгашининг тегишли қарорида белгиланган.
Гап А-373 “Тошкент–Оҳангарон–Ангрен–Қўқон–Шаҳрихон–Андижон” автомобиль йўлининг 103–131-километрлари оралиғидаги ҳудуд ҳақида бормоқда.
Қарорга кўра, М1, М2 ва N1 тоифасидаги енгил ҳамда енгил юк ташувчи транспорт воситалари учун энг юқори ҳаракат тезлиги соатига 80 километр этиб белгиланган. N2 ва N3 тоифасидаги оғир юк автомобиллари учун эса мазкур кўрсаткич соатига 50 километр қилиб белгиланди.
Ҳужжатда қайд этилишича, мазкур чекловлар йўл-транспорт ҳодисаларининг олдини олиш, ҳаракат хавфсизлигини таъминлаш, шунингдек, фуқароларнинг ҳаёти ва соғлиғини муҳофаза қилиш мақсадида жорий этилган.
Шу билан бирга, тезлик чеклови амал қиладиган ҳудудларда 3.24-рақамли “Юқори тезлик чекланган” йўл белгилари ҳамда қўшимча ахборот кўрсаткичлари ўрнатилади.
