Ўзбекистонда соғлиқни сақлаш ва ижтимоий хизматлар соҳасида фаолият юритаётган корхона ва ташкилотлар сони 14 мингдан ошди. Бу ҳақда Миллий статистика қўмитаси маълум қилди.
Қайд этилишича, 2026 йилнинг 1 май ҳолатига кўра, мамлакатда мазкур йўналишда жами 14 минг 732 та корхона ва ташкилот фаолият юритмоқда.
Статистикага кўра, ушбу кўрсаткич ўтган йилнинг мос даврига нисбатан қарийб 2,4 мингтага ошган. Бу эса соғлиқни сақлаш ва ижтимоий хизматлар соҳасида хусусий ва давлат ташкилотлари сони ўсиб бораётганини кўрсатади.
Ҳудудлар кесимида энг кўп соғлиқни сақлаш ва ижтимоий хизматлар ташкилотлари Тошкент шаҳрида қайд этилган бўлиб, уларнинг сони 2 минг 439 тани ташкил қилган.
Кейинги ўринларда Фарғона вилояти — 1 минг 590 та ва Самарқанд вилояти — 1 минг 546 та корхона ва ташкилот билан жойлашган.
Шунингдек, Андижон вилоятида 1 минг 264 та, Тошкент вилоятида 1 минг 132 та, Қашқадарё вилоятида 1 минг 107 та ҳамда Бухоро вилоятида 1 минг 28 та соҳа субъекти фаолият юритмоқда.
Рейтингнинг қуйи қисмида Сирдарё вилояти 323 та, Жиззах вилояти 463 та ва Навоий вилояти 533 та корхона ва ташкилот билан қайд этилган.
Мутахассислар фикрича, соғлиқни сақлаш соҳасидаги субъектлар сонининг ортиши аҳолига тиббий ва ижтимоий хизматлар кўламини кенгайтиришга хизмат қилиши мумкин.
