Айрим нашрларда келтирилишича, машҳур жуфтлик тақиқланган моддалар билан боғлиқ текширув доирасида ҳуқуқни муҳофаза қилувчи органлар томонидан сўроққа чақирилган бўлиши мумкин.
Тарқалаётган маълумотларга кўра, ушбу иш доирасида Кенан Доғулунинг укаси Озан Доғулу ҳамда актёр Энис Ариканнинг исмлари ҳам тилга олинмоқда.
Журналистлар маълум қилишича, текширувга жалб этилган айрим шахслар таҳлил топшириш учун Суд-тиббиёт экспертизаси институтига олиб борилган. Шунингдек, уларнинг прокурор билан суҳбат ўтказиши кутилмоқда. Допинг-тест натижалари эса келаси ҳафтада маълум қилиниши мумкинлиги айтилмоқда.
Бироқ айни вақтга қадар Туркиянинг ваколатли органлари томонидан мазкур ҳолат бўйича расмий баёнот берилмаган. Шунингдек, Берен Саат, Кенан Доғулу ёки уларнинг вакиллари ҳам тарқалаётган хабарларга муносабат билдирмаган.
Шу боис мазкур маълумотлар ҳозирча расман тасдиқланмаган бўлиб қолмоқда.
Қайд этиш жоиз, Берен Саат Туркиянинг машҳур актрисаларидан бири бўлиб, у “Тақиқланган севги” сериалидаги Бихтер роли орқали катта шуҳрат қозонган. Кенан Доғулу эса мамлакатнинг таниқли эстрада хонандаларидан бири ҳисобланади.
Ҳозирча воқеа юзасидан расмий маълумотлар кутилмоқда.
