Ўзбекистонда айрим тоифадаги ходимларнинг иш ташлашларда иштирок этиши тақиқланди. Бу 2026 йил 11 июнь куни қабул қилинган ЎРҚ–1150-сонли Қонун билан айрим қонун ҳужжатларига киритилган ўзгартиш ва қўшимчаларда белгиланган.
Қонунга кўра, фавқулодда ҳолат ёки фавқулодда вазиятлар даврида, шунингдек, уруш ҳолати жорий этилганда ёки умумий сафарбарлик эълон қилинган вақтда иш ташлашларга йўл қўйилмайди.
Шу билан бирга, айрим соҳа вакилларининг иш ташлашларда қатнашиши ҳам тақиқланган. Жумладан, тиббиёт ходимлари, давлат органлари ваколатларини амалга ошириш учун Давлат фуқаролик хизмати лавозимларининг давлат реестрига киритилган шахслар, ҳарбий хизматчилар, судьялар ҳамда суд ва ҳуқуқни муҳофаза қилувчи органларнинг махсус ёки ҳарбий унвонга эга ходимлари иш ташлашларда иштирок эта олмайди.
Бундан ташқари, энергия ва сув таъминоти тизими ташкилотлари ходимлари ҳамда алоқа тизимида фаолият юритувчи ходимлар учун ҳам мазкур чеклов татбиқ этилади.
Қонунчиликка мувофиқ, Меҳнат кодекси ва бошқа қонун ҳужжатларида назарда тутилган талаблар бузилган ҳолда ўтказилган ёки эълон қилинган иш ташлашлар ноқонуний деб топилади.
Мазкур қонун расман эълон қилинган кундан эътиборан кучга кирди.
