Президент Шавкат Мирзиёев аҳоли саломатлиги ва миллат генофондини гиёҳвандлик таҳдидидан ҳимоя қилиш, шунингдек, йўл ҳаракати хавфсизлигини таъминлашга қаратилган қонунчилик ташаббуслари тақдимоти билан танишди. Бу ҳақда Президент матбуот хизмати хабар берди.
Тақдимотда гиёҳвандлик воситалари, психотроп моддалар, уларнинг аналоглари ҳамда кучли таъсир қилувчи моддаларнинг ноқонуний муомаласи учун жавобгарликни кучайтиришга қаратилган қонун мазмун-моҳияти ҳақида маълумот берилди.
Қайд этилишича, парламент томонидан қабул қилинган қонун билан Жиноят кодексига “Аҳоли саломатлиги ва генофондига қарши жиноятлар” деб номланган янги боб киритилмоқда. Мазкур ўзгаришлар аҳоли, айниқса, ёшлар саломатлигига таҳдид солувчи хавфли қилмишлар учун жавобгарликни кучайтиришга хизмат қилади.
Шунингдек, ноқонуний нарколаборатория ташкил этиш, наркотик моддалар савдосини бошқариш, бангихона ташкил қилиш каби жиноятлар учун алоҳида жавобгарлик белгиланмоқда. Бундан ташқари, ўндан ортиқ турдаги хавфли қилмишлар бўйича жазо чоралари оғирлаштирилмоқда.
Президент мазкур қонун наркожиноятчиликка қарши курашишни янги босқичга олиб чиқишини таъкидлаб, уни имзолади.
Тақдимот давомида “Наркотиклар ва кучли таъсир қилувчи моддалар тўғрисида”ги янги қонун лойиҳаси ҳам муҳокама қилинди.
Таъкидланишича, сўнгги йилларда анъанавий гиёҳвандлик воситалари ўрнини синтетик наркотиклар эгалламоқда. Улар асосан интернет орқали контактсиз усулда тарқатилмоқда. Шу билан бирга, мамлакат ҳудудида яширин нарколабораториялар пайдо бўлаётгани соҳадаги ҳуқуқий механизмларни қайта кўриб чиқишни талаб этмоқда.
Янги қонун лойиҳасида давлат сиёсатининг еттита асосий йўналиши белгиланган. Улар қаторида аҳолида, айниқса, ёшлар ва хотин-қизларда гиёҳвандликка қарши иммунитетни шакллантириш, интернет орқали содир этилаётган наркожиноятларга қарши курашиш, профилактика, эрта ташхис, даволаш ва реабилитация тизимини такомиллаштириш каби чоралар мавжуд.
Лойиҳада наркотиклар айланмаси устидан назоратни кучайтириш ҳам назарда тутилган. Хусусан, қонуний муомаладаги моддаларни олиб киришдан тортиб сотишгача бўлган барча жараёнлар электрон назорат тизими орқали кузатиб борилади.
Тақдимотда йўл ҳаракати хавфсизлиги масалаларига ҳам алоҳида эътибор қаратилди.
Қайд этилишича, айрим ҳолатларда фуқаролар вояга етмаган шахсларга транспорт воситаларини бошқаришга рухсат бермоқда. Бу эса йўл-транспорт ҳодисалари, ўлим ва оғир жароҳатланиш ҳолатларига сабаб бўлмоқда.
Шу муносабат билан йўл ҳаракати қоидаларига риоя этилишини таъминлаш, оғир оқибатли аварияларнинг олдини олиш ва бу борадаги жавобгарликни кучайтириш бўйича таклифлар кўриб чиқилди.
Президент Мирзиёев гиёҳвандлик ва наркожиноятларга қарши курашишни замон талаблари асосида ташкил этиш, ёшлар орасида мазкур иллат тарқалишига қарши қатъий чоралар кўриш ҳамда йўлларда инсон ҳаёти ва хавфсизлигини таъминлашга қаратилган таклифларни маъқуллади.
Муҳокама қилинган масалалар юзасидан масъулларга тегишли топшириқлар берилди.
