2026 йилги футбол бўйича Жаҳон чемпионати очилиш учрашувида Мексика терма жамоаси Жанубий Африка устидан 2:0 ҳисобида ғалаба қозонди.
Мусобақанинг илк баҳси Мехико шаҳридаги машҳур "Ацтека" стадионида бўлиб ўтди. Учинчи бор Жаҳон чемпионати ўйинларига мезбонлик қилаётган аренадаги учрашувни бразилиялик ҳакам Вилтон Сампайо бошқарди.
Ўйин тезкор гол билан бошланди. Мексика ҳужумчиси Хулиан Киньонес 9-дақиқада ҳисобни очиб, мундиалнинг дастлабки голига муаллифлик қилди.
Иккинчи бўлимда эса майдондаги вазият Жанубий Африка учун янада оғирлашди. 49-дақиқада ярим ҳимоячи Яя Ситхоле қўпол ҳаракати учун тўғридан-тўғри қизил карточка олиб, жамоасини бир киши кам ҳолда қолдирди.
Мексикаликлар сон жиҳатидан устунликдан унумли фойдаланди. 67-дақиқада тажрибали ҳужумчи Рауль Хименес ҳисобни 2:0 кўринишига келтириб, жамоасининг ғалабасини деярли таъминлади.
Учрашувнинг 84-дақиқасида VAR ёрдамида кўрилган эпизоддан сўнг Жанубий Африка ҳужумчиси Темба Зване рақибининг юзига зарба бергани учун майдондан четлатилди. Шу тариқа африкаликлар баҳснинг қолган қисмида тўққиз нафар футболчи билан ҳаракат қилишга мажбур бўлди.
Қизиқарлиси, қўшимча вақтнинг иккинчи дақиқасида Мексика ҳимоячиси Сесар Монтес ҳам қизил карточка олди. Натижада мундиалнинг очилиш учрашувида ҳакам томонидан жами учта қизил карточка кўрсатилди.
Шундай қилиб, Мексика терма жамоаси "А" гуруҳидаги иштирокини ишончли ғалаба билан бошлаб, 3 очко билан пешқадамга айланди. Жанубий Африка эса биринчи турдан кейин очкосиз қолди.
Гуруҳнинг яна бир учрашувида Жанубий Корея ва Чехия терма жамоалари ўзаро баҳс олиб боради. Мазкур ўйин Тошкент вақти билан 18 июнь куни соат 07:00 да старт олади.
