Рим Папаси Лев XIV “Реал Мадрид” футбол клубининг фахрий аъзоси этиб тайинланди. Бу ҳақда клуб матбуот хизмати хабар берди.
Маълум қилинишича, клуб президенти Флорентино Перес раислигида ўтказилган директорлар кенгаши йиғилишида Папа Лев XIVга “Реал Мадрид”нинг энг юқори эътирофларидан бири ҳисобланган фахрий аъзолик унвонини бериш тўғрисида қарор қабул қилинган.
Шунингдек, жорий йилнинг 8 июнь куни Папа Лев XIV Мадрид архиепархияси вакиллари билан учрашув доирасида “Сантьяго Бернабеу” стадионига ташриф буюрган. Ташриф чоғида Флорентино Перес унга исми ва 1 рақами туширилган махсус “Реал Мадрид” футболкасини ҳамда стадион макетини совға қилган.
Ўз навбатида, Папа Лев XIV клуб президентига эсдалик медалини тақдим этган.
Клуб баёнотида қайд этилишича, мазкур қарор орқали “Реал Мадрид” бутун дунё бўйлаб тинчлик, бирдамлик ва адолат ғояларини тарғиб қилиб келаётган шахсга бўлган ҳурматини ифода этган.
Аввалроқ Папа Лев XIV “Реал Мадрид” ва “Барселона” ўртасидаги рақобатда мадридликлар жамоасига хайрихоҳ эканини маълум қилган эди.
