Қашқадарё вилоятининг Қарши шаҳри ҳокимининг биринчи ўринбосари Нурбек Турдиев ходимларни дам олиш кунлари ишга жалб қилгани учун маъмурий жавобгарликка тортилди. Бу ҳақда Давлат меҳнат инспекцияси маълум қилди.
Билдирилишича, ҳоким ўринбосарининг ходимларни дам олиш кунлари мажбуран ишга жалб қилгани ҳамда уларга нисбатан ҳақоратли муносабатда бўлгани ҳақида келиб тушган мурожаат белгиланган тартибда ўрганилган.
Текширув натижаларига кўра, мансабдор шахс томонидан мажбурий меҳнатга йўл қўйилгани тасдиқланган.
Шундан сўнг унга нисбатан Ўзбекистон Республикаси Маъмурий жавобгарлик тўғрисидаги кодекснинг 51-моддаси асосида маъмурий чора қўлланилган. Нурбек Турдиев базавий ҳисоблаш миқдорининг 100 баравари — 41 миллион 200 минг сўм миқдорида жаримага тортилган.
Шунингдек, ходимларга нисбатан ҳақоратли муносабатда бўлингани юзасидан унинг хатти-ҳаракатларини Одоб-ахлоқ комиссиясида кўриб чиқиш масаласи бўйича Қашқадарё вилояти ҳокимлигига тақдимнома киритилган.
Давлат меҳнат инспекцияси иш берувчиларни меҳнат қонунчилиги талабларига қатъий риоя қилишга чақирган.
Эслатиб ўтамиз, Ўзбекистон қонунчилигига кўра, ходимларни уларнинг розилигисиз дам олиш кунлари ишга жалб қилиш мажбурий меҳнат деб баҳоланиши мумкин.
