13 июнь куни футбол бўйича 2026 йилги Жаҳон чемпионатининг “D” гуруҳидан ўрин олган АҚШ ва Парагвай терма жамоалари ўртасидаги 1-тур баҳси бўлиб ўтди. Инглвуд шаҳридаги “СоФай” стадионида кечган учрашув америкаликларнинг 4:1 ҳисобидаги ишончли ғалабаси билан якунланди.
Нидерландиялик ҳакам Денни Маккели бошқариб борган баҳсда ҳисоб 7-дақиқада очилди. Парагвай ярим ҳимоячиси Дамиан Бобадилья ўз дарвозасига тўп киритиб қўйди ва АҚШ олдинга чиқиб олди.
29-дақиқада Фоларин Балогун рақиб дарвозасини ишғол қилган бўлса-да, офсайд сабаб гол бекор қилинди. Шунга қарамай, ҳужумчи орадан икки дақиқа ўтиб барибир ўз мақсадига эришди. У 31-дақиқада жамоасининг иккинчи голини урди.
Балогун биринчи бўлимнинг 45-дақиқасида яна бир бор гол киритиб, дубль муаллифига айланди ва танаффусга қадар АҚШнинг устунлигини янада мустаҳкамлади.
Иккинчи бўлим ўрталарида Парагвай терма жамоаси Маурисионинг аниқ зарбаси орқали ҳисобдаги фарқни қисқартиришга муваффақ бўлди. Бироқ учрашувнинг сўнгги дақиқаларида америкаликлар нуқтани қўйди. Қўшимча вақтнинг 90+8-дақиқасида Жованни Рейна гол уриб, ҳисобни 4:1 кўринишига келтирди.
Шу тариқа, АҚШ терма жамоаси Жаҳон чемпионатидаги иштирокини ишончли ғалаба билан бошлади ва дастлабки турдан кейин 3 очко билан “D” гуруҳида якка пешқадамга айланди. Парагвай эса мусобақани мағлубият билан бошлаб, ҳозирча очкосиз қолмоқда.
Маълумот учун, мазкур гуруҳдан Туркия ва Швейцария терма жамоалари ҳам ўрин олган.
