Маълум қилинишича, 16–18 июнь кунлари Тошкентдаги CAEx International Exhibition Center мажмуасида бешинчи Тошкент халқаро инвестиция форуми (TXIF-2026) бўлиб ўтади. Мазкур йирик анжуман ҳозирнинг ўзидаёқ бир қатор рекорд кўрсаткичларни қайд этди. Бу ҳақда Ўзбекистон Республикаси Инвестициялар, саноат ва савдо вазирлиги хабар берди.
Маълум қилинишича, форумда иштирок этиш учун дунёнинг 100 дан ортиқ давлатидан 8,3 мингдан зиёд делегат рўйхатдан ўтган. Иштирокчи компанияларнинг умумий активлари 42 триллион АҚШ долларини ташкил этади.
Тадбирда дунёдаги йирик корпорациялар — BlackRock, JPMorgan Chase, Visa, Masdar, Airbus ва Meta раҳбарлари иштирок этмоқда.
Форум доирасида 2 780 дан ортиқ бизнес етакчилари қатнашиши кутилмоқда. Бу кўрсаткич ўтган йилга нисбатан сезиларли ўсишни англатади.
Шунингдек, анжуманнинг юқори сиёсий аҳамиятини 62 та давлат ҳукумат делегацияларининг иштирок этаётгани тасдиқлайди. Очилиш маросимида бир қатор давлат раҳбарлари ва бош вазирлар нутқ сўзлаши режалаштирилган.
Бу йилги форум дастури кенгайтирилиб, 79 та тадбирни ўз ичига олган. Уларда сунъий интеллект, “яшил” энергетика, логистика ва стратегик хомашё соҳалари муҳокама қилинади.
Анжуман доирасида Ўзбекистоннинг инвестиция салоҳияти кўргазмаси, хорижий инвесторлар кенгаши йиғилиши ҳамда спорт тадбирлари — теннис турнири ва тунги марафон ҳам ўтказилиши режалаштирилган.
Форум халқаро оммавий ахборот воситалари, жумладан BBC News, Reuters, Bloomberg, Euronews, CGTN, TRT World ва Xinhua томонидан кенг ёритилмоқда.
Маълумотларга кўра, форум давомида минтақанинг иқтисодий келажагига доир ўнлаб миллиард долларлик йирик келишув ва битимлар имзоланиши кутилмоқда.
