Сенатнинг 13-июндаги ялпи мажлисида “Аҳолини шовқиннинг зарарли таъсиридан ҳимоя қилиш тўғрисида”ги қонуни маъқулланди.
Сенат мажлисида қайд этилишича, амалда шовқиннинг зарарли таъсирини чеклашга қаратилган санитария меъёрлари мавжуд бўлса-да, қонунчиликда бу борада аниқ талаблар белгиланмагани сабабли уларга тўлиқ риоя этилмаётган эди.
Янги қонун билан аҳолини шовқиннинг зарарли таъсиридан ҳимоя қилишнинг умумий қоидалари, давлат органларининг ваколатлари, шунингдек, жисмоний ва юридик шахсларнинг ҳуқуқ ҳамда мажбуриятлари аниқ белгилаб қўйилди.
Ҳужжатда фуқароларнинг осойишталиги ва дам олишини бузадиган шовқин турлари, бундай ҳаракатларга йўл қўйилмайдиган вақтлар ҳамда шовқин туфайли етказилган зарар учун компенсация тўлаш тартиби назарда тутилган.
Мажлисда таъкидланишича, юқори даражадаги шовқин юрак-қон томир касалликлари ва асаб тизимига салбий таъсир кўрсатиши мумкин. Доимий шовқин шароитида инсоннинг меҳнат унумдорлиги 10–30 фоизгача пасайиши кузатилади. Шунингдек, шовқин болалар саломатлиги ва таълим сифатига ҳам салбий таъсир кўрсатади.
Санэпидқўм маълумотига кўра, Ўзбекистонда турар жой ҳудудлари учун шовқин меъёри кундузи 45 децибел, тунги вақтда эса 35 децибел этиб белгиланган.
Шунингдек, шовқин туфайли соғлиғига зарар етганини исботлаган фуқаролар компенсация талаб қилиш ҳуқуқига эга бўлади. Компенсация миқдори ва уни тўлаш тартиби кейинроқ тасдиқланади.
