Вашингтонда ўтказилган UFC Freedom 250 турнирининг марказий жангида америкалик файтер Жастин Гэтжи Илия Топурия устидан ғалаба қозониб, енгил вазн тоифасидаги чемпионлик камарини қўлга киритди.
Маълум қилинишича, жангнинг илк раундларида Топурия фаолроқ ҳаракат қилган. Бироқ кейинги бўлимларда Гэтжи ташаббусни ўз қўлига олиб, рақибига жиддий босим ўтказган.
Тўртинчи раунд якунланганидан сўнг шифокорлар Топурияни кўрикдан ўтказган. Жангчининг кўриш билан боғлиқ муаммолари кузатилгани сабабли унинг мураббийлари баҳсни давом эттирмасликка қарор қилган. Шу тариқа техник нокаут қайд этилган ва Гэтжи ғолиб деб топилган.
Жангдан кейин америкалик файтер ғалабага ишониши қийин бўлганини айтган.
“Биринчи раунддан омон чиқишим кераклигини билардим. У жуда хавфли рақиб эди. Аммо чидамлилигим ва матонатим ғалабага ёрдам берди”, деган Гэтжи.
Қайд этилишича, турнирни томоша қилиш учун АҚШ Президенти Дональд Трамп ҳам ташриф буюрган. У жангдан кейин Жастин Гэтжини шахсан табриклаган.
Ко-мейн ивентда эса франциялик Сирил Ган бразилиялик Алекс Перейрани иккинчи раундда нокаутга учратиб, оғир вазн тоифасида вақтинчалик чемпионлик камарини қўлга киритган.
Шунингдек, турнир доирасида Шон О’Мэлли Айеманн Заҳабини, Бо Никал эса Кайл Даукаусни мағлуб этган.
