Германия канцлери Фридрих Мерц G7 саммити доирасида АҚШ Президенти Дональд Трампга Германия миллий терма жамоаси футболкасини совға қилди. Бу ҳақда New York Post нашри хабар берди.
Маълум қилинишича, учрашув бошланишидан аввал Мерц Трампга оқ рангли футболкани топширган. Унинг орқа қисмига АҚШ Президентининг фамилияси ва 47-рақам туширилган бўлган.
Кадрларда Дональд Трамп совғани қабул қилиб, уни йиғилганлар ва бошқа сиёсатчиларга намойиш этгани акс этган. Шундан сўнг у футболкани эҳтиёткорлик билан йиғиб, стол устига қўйган.
Оммавий ахборот воситалари маълумотига кўра, мазкур совға Трампнинг 14 июнь куни нишонланган таваллуд айёми муносабати билан берилган.
G7 саммити 15–17 июнь кунлари Франциянинг Эвиан-ле-Бен шаҳрида бўлиб ўтмоқда. Унда дунёнинг етакчи иқтисодиётларига эга давлатлар раҳбарлари глобал сиёсат, хавфсизлик ва иқтисодий ҳамкорликка оид масалаларни муҳокама қилмоқда.
Қайд этиш жоиз, саммит давомида Дональд Трампнинг жамоатчилик олдидаги кўриниши ва давлат раҳбарлари билан мулоқоти халқаро ОАВ диққат марказида бўлиб турибди. Хусусан, унинг Франция Президенти Эммануэл Макрон билан аввалги йилларга нисбатан анча сокин ва расмий саломлашуви муҳокамаларга сабаб бўлган.
