Ёзнинг жазирама кунларида юрак-қон томир касалликларидан азият чекувчи инсонлар учун хавф янада ортади. Мутахассислар юқори ҳарорат қон босимига жиддий таъсир кўрсатиши мумкинлигидан огоҳлантирмоқда.
Тиббиёт ходимларининг таъкидлашича, иссиқ ҳавода организм ўзини совитиш учун қўшимча ресурсларни ишга солади. Бу жараёнда қон томирлари кенгаяди ва қон босими пасайиши мумкин. Бироқ сувсизланиш, кучли стресс ёки жисмоний зўриқиш аксинча, босимнинг кескин кўтарилишига сабаб бўлади.
Юқори ҳарорат шароитида юрак тана ҳароратини меъёрда ушлаб туриш ва қон айланишини таъминлаш учун одатдагидан кўпроқ ишлайди. Шу боис юрак-қон томир тизимида муаммоси бор инсонлар хавф гуруҳига киради.
Иссиқлик таъсирининг хавфли белгилари
Мутахассислар иссиқлик таъсирида қуйидаги аломатлар кузатилиши мумкинлигини қайд этмоқда:
– бош айланиши ва ҳолсизлик;
– юрак уришининг тезлашиши;
– бош оғриғи;
– нафас қисилиши;
– кўнгил айниши ва қусиш;
– оғир ҳолатларда тиришиш ва ҳушдан кетиш.
Бундай ҳолатларда инсон дарҳол салқин жойга ўтиши, сув ичиши ва аҳволи яхшиланмаса, шифокорга мурожаат қилиши лозим.
Жазирамада ўзингизни қандай ҳимоя қилиш мумкин?
Аввало, организмдаги сув мувозанатини сақлаш муҳим. Мутахассислар ҳар бир килограмм тана вазнига камида 30 миллилитр сув истеъмол қилишни тавсия этади.
Шунингдек, рационга калий ва магнийга бой сабзавот ҳамда меваларни киритиш мақсадга мувофиқ. Бундай маҳсулотлар қон босимини барқарор сақлашга ёрдам беради.
Иссиқ кунларда табиий матодан тикилган, ҳаво яхши ўтказадиган кенг ва оч рангли кийимлар кийиш тавсия этилади.
Бундан ташқари, соат 11:00 дан 16:00 гача бўлган вақтда қуёш нурлари энг кучли бўлишини инобатга олиб, имкони борича очиқ ҳавода узоқ қолмаслик керак.
Аҳвол оғирлашганда нима қилиш лозим?
Агар инсоннинг аҳволи юқори ҳарорат таъсирида кескин ёмонлашса, уни салқин ва яхши шамоллатиладиган хонага олиб кириш, оёқларини танасидан баландроқ ҳолатда ётқизиш ҳамда сувни кичик қултумлар билан ичириш зарур.
Шифокор томонидан тавсия этилган дори воситалари мавжуд бўлса, уларни қабул қилиш мумкин. Агар ҳолат оғирлашса ёки ҳушдан кетиш кузатилса, зудлик билан тез тиббий ёрдам чақириш лозим.
Мутахассислар ёзнинг иссиқ кунларида саломатликка бефарқ бўлмаслик ва организмдан келаётган ҳар қандай хавфли сигналларга ўз вақтида эътибор қаратишни тавсия қилмоқда.
