Қирғизистон Давлат солиқ хизмати раиси Алмамбет Шикмаматов мамлакатда TikTok ижтимоий тармоғига қўйилган чекловни бекор қилиш тарафдори эканини билдирди. Бу ҳақда у бугун, 17 июнь куни журналистлар ва блогерлар билан бўлиб ўтган учрашувда маълум қилди.
Шикмаматовнинг айтишича, TikTok’ни блоклаш орқали кўзланган мақсадга эришилмаяпти. Чунки фойдаланувчилар VPN хизматлари ёрдамида платформадан фойдаланишда давом этмоқда.
“Одамлар барибир TikTok’ни VPN орқали томоша қиляпти. Бундан қочиб қутулиб бўлмайди. Агар бу масала бўйича овоз бериш ўтказилса, мен TikTok’ни очиш тарафдори бўлардим”, деди у.
Давлат солиқ хизмати раҳбари рақамли платформалар бугунги кунда иқтисодиётнинг муҳим қисмига айланганини, айниқса ёшлар давлат кўмагисиз контент яратиб, даромад топаётганини таъкидлади.
Шунингдек, у Қирғизистонда YouTube монетизациясини тўлиқ йўлга қўйиш имкониятлари ҳам муҳокама қилинаётганини маълум қилди. Унинг сўзларига кўра, бу масала Креатив индустриялар парки вакили Дониёр Омоналиев билан ҳам кўтарилган.
Шикмаматов Google компанияси билан ҳамкорликни кучайтириш ва Қирғизистонни халқаро майдонда фаол тарғиб қилиш орқали мамлакат фойдаланувчилари учун YouTube монетизациясини ишга тушириш мумкинлигини қайд этди.
“Бугун кўплаб қирғизистонликлар сифатли контент яратмоқда. Бироқ улар YouTube орқали тўлиқ даромад олиш имкониятига эга эмас. Биз монетизация Қирғизистон учун ҳам очилиши устида ишлашимиз керак”, деди у.
Унинг фикрича, блогерлик фаолияти, креатив индустрия ва рақамли контент ишлаб чиқариш келажакда мамлакат иқтисодиётининг муҳим тармоқларидан бирига айланиб, давлат бюджетига тушумларни ошириши мумкин.
