Йиғилиш аввалида давлат раҳбари Европа тикланиш ва тараққиёт банки президенти Одиль Рено-Бассога Ўзбекистонда амалга оширилаётган ислоҳотларни изчил қўллаб-қувватлаб келаётгани ҳамда кенгаш фаолиятига самарали раислик қилаётгани учун миннатдорлик билдирди.
Шунингдек, Президент анжуманда иштирок этаётган халқаро ташкилотлар ва хорижий компаниялар раҳбарларига самимий эҳтиромини изҳор этди.
Таъкидланишича, сўнгги йилларда Хорижий инвесторлар кенгаши оддий маслаҳат механизми эмас, балки амалий ислоҳотлар майдонига айланиб, Янги Ўзбекистон билан жаҳон инвестиция ҳамжамияти ўртасидаги ишончли кўприк вазифасини бажармоқда.
Давлат раҳбари бугунги кунда кенгаш мустақил ассоциация мақомига эга бўлиб, том маънода кучли институт даражасига кўтарилганини қайд этди.
Маълум қилинишича, ўтган бир йил давомида кенгаш иштирокчилари сони 54 та компаниядан 85 тага етган. Улар иқтисодиётнинг 23 та тармоғини қамраб олган ҳолда ишчи гуруҳлар фаолиятида бевосита иштирок этмоқда.
Бундан ташқари, Европа тикланиш ва тараққиёт банки, Осиё тараққиёт банки ҳамда Халқаро молия корпорацияси кенгашнинг Ижроия қўмитаси таркибида фаолият юритиб келмоқда.
