Ўзбекистонда олий таълим муассасаларида таҳсил олаётган талабалар сони 1 миллион 535 минг нафарга етди. Бу ҳақда Миллий статистика қўмитаси маълум қилди.
Қайд этилишича, 2025/2026 ўқув йили бошида республикадаги олий таълим ташкилотларида таҳсил олаётган талабалар сони 1 миллион 535 минг нафарни ташкил этган. Бу кўрсаткич 2024/2025 ўқув йилига нисбатан 102,2 минг нафарга ёки 7,1 фоизга кўпдир.
Статистикага кўра, талабаларнинг 782,9 минг нафарини аёллар, 752,1 минг нафарини эса эркаклар ташкил қилган. Шу тариқа олий таълимда таҳсил олаётганлар орасида аёллар улуши юқорилиги кузатилмоқда.
Сўнгги йилларда мамлакатда талабалар сони изчил ўсиб бормоқда. Хусусан, 2021/2022 ўқув йилида олий таълим муассасаларида 808,4 минг нафар талаба таҳсил олган бўлса, 2022/2023 ўқув йилида бу кўрсаткич 1 миллион 42,1 минг нафарга етган. 2023/2024 ўқув йилида талабалар сони 1 миллион 314,5 минг нафарни ташкил этган бўлса, 2024/2025 ўқув йилида 1 миллион 432,8 минг нафарга етган.
2025/2026 ўқув йили бошида эса мазкур рақам илк бор 1,5 миллионлик маррадан ошди.
Аввалроқ Миллий статистика қўмитаси мамлакатда фаолият юритаётган олий таълим ташкилотлари сони бўйича ҳам маълумот эълон қилган эди.
