Ўзбекистонда қўшилган қиймат солиғини ҳисоблаш ва тўлашнинг соддалаштирилган тартибига ўтиш бўйича тадбиркорлардан келиб тушган аризаларнинг асосий қисми маъқулланди. Бу ҳақда Солиқ қўмитаси матбуот хизмати хабар берди.
Маълум қилинишича, тадбиркорлик субъектларидан мазкур тартибга ўтиш бўйича жами 5 601 та хабарнома келиб тушган.
Ўрганишлар якунларига кўра, уларнинг 4 913 таси қабул қилинган. Шу билан бирга, 352 та хабарнома белгиланган талабларга жавоб бермагани сабабли рад этилган. Яна 336 та хабарнома эса тадбиркорларнинг ўзи томонидан шахсий кабинет орқали бекор қилинган.
Солиқ қўмитаси маълумотига кўра, аризаси рад этилган тадбиркорлар асосий фаолият турини аниқлаштириб, бириктирилган солиқ инспекторига мурожаат қилган ҳолда хабарномани қайта топшириши мумкин.
Эслатиб ўтиш жоиз, умумий овқатланиш, савдо ва хизмат кўрсатиш соҳасида фаолият юритувчи тадбиркорларга қўшилган қиймат солиғини ҳисоблаш ва тўлашнинг соддалаштирилган тартибини танлаш имконияти берилган.
Ушбу тартибга кўра, ҚҚС ставкаси товарлар ва хизматларни реализация қилиш бўйича барча айланмалар учун 6 фоиз этиб белгиланади. Бунда сотиб олинган товар ва хизматлар бўйича тўланган ҚҚС суммасини ҳисобга олиш ҳуқуқи берилмайди.
Шунингдек, ҚҚС бўйича амалдаги имтиёзлар ва преференциялар, солиқнинг бир қисмини қайтариш тартиби қўлланилмайди ҳамда мавжуд салбий фарқ суммаси ҳисобдан чиқарилади.
Мазкур тартибдан давлат улуши 50 фоиз ва ундан юқори бўлган корхоналар ҳамда йирик солиқ тўловчилар фойдалана олмайди. Тадбиркорлар тизимга ўтиш учун "my.soliq.uz" платформасидаги шахсий кабинети орқали хабарнома юбориши лозим.
