Италия пойтахти Рим шаҳри чеккасидаги Кастель-ди-Гвидо ҳудудида Рим империяси даврига мансуб ҳашаматли вилла қолдиқлари аниқланди. Бу ҳақда CNN хабар берди.
Маълум қилинишича, жорий йилнинг февраль ойида маҳаллий аҳоли ҳудудда шубҳали фаолият кузатилаётгани ҳақида ҳуқуқни муҳофаза қилувчи органларга хабар берган. Текширув жараёнида карабинерлар қадимий археологик ёдгорликларда ноқонуний қазиш ишлари олиб борилганидан далолат берувчи изларни аниқлаган.
Тергов маълумотларига кўра, бир гуруҳ шахслар экскватор ёрдамида ҳудудга кириб, ер остида жойлашган катта иншоотни очишга уринган. Қазиш ишлари тез орада тўхтатилган бўлса-да, натижада илгари фанга маълум бўлмаган қадимий вилла қолдиқлари юзага чиққан.
Археологлар ҳозирга қадар атриум ва сув йиғиш ҳавзасига эга катта зални, шунингдек қора ва оқ рангларда ишланган мураккаб геометрик ҳамда ўсимликсимон нақшлар билан безатилган мозаика полларни аниқлаган.
Италия Маданият вазирлиги вакилларининг билдиришича, мазкур ҳудуд қадимда Лориум манзили таркибига кирган бўлиб, бу ерга Рим императорлари тез-тез ташриф буюрган. Мутахассислар вилла Рим аристократиясининг юқори табақаси вакилларига тегишли бўлган бўлиши мумкинлигини тахмин қилмоқда.
Шунингдек, қазиш ишлари давомида мармар безаклар ҳамда Рим мифологиясидаги табиат худоси Силванга тегишли ҳайкал парчалари ҳам топилган.
Расмийлар ноқонуний қазишлар оқибатида ёдгорликнинг айрим қисмларига зарар етганини билдирган. Ҳозирда археологик тадқиқотлар давом этмоқда. Келгусида мазкур ҳудуд ташриф буюрувчилар учун махсус рўйхат асосида очилиши режалаштирилган.
